ವಜ್ರಖಚಿತ ಕಿರೀಟ ಹಿಂದಿರುಗಿಸಬೇಕೆ...?

   ತಿರುಪತಿಯಲ್ಲಿ ಸೆಪ್ಟೆಂಬರ್ 6, 2011 ರಂದು  ಭಕ್ತ ಸಮೂಹದ ಕೂಗೂ ಹೀಗಿತ್ತು. ' ಜನಾರ್ದನ ರೆಡ್ಡಿ ಅಕ್ರಮ ಗಣಿಗಾರಿಕೆಯ ಪಾಪದ ಹಣದಿಂದ ನೀಡಿದ ವಜ್ರಖಚಿತ ಕಿರೀಟವನ್ನು ತಿಮ್ಮಪ್ಪನಿಗೆ ತೊಡಿಸಬಾರದು. ಅದನ್ನು ಹಿಂದಿರುಗಿಸಬೇಕು. ಅಕ್ರಮ ಹಣದಿಂದ ಬಂದ ದುಡ್ಡಿನಿಂದ ಹರಕೆ ತೀರಿಸಿರುವ ರೆಡ್ಡಿಗಳ ಕಿರೀಟದಿಂದ ದೇವರು ಅಪವಿತ್ರರಾಗುತ್ತಾರೆ. ಆದ್ದರಿಂದ ದೇಗುಲದಲ್ಲಿ ಇಂಥ ಕಿರೀಟ ಇರುವುದು ಬೇಡವೇಬೇಡ ಮೊದಲು ಹಿಂದಿರುಗಿಸಿ' ಹಿಂದೆ ಎಂದೂ ಕೇಳಿರದ ಬೇಡಿಕೆ-ಆಗ್ರಹ-ಒತ್ತಡ ಆಡಳಿತ ಮಂಡಳಿಯನ್ನು ಕಂಗಾಲಾಗಿಸಿದೆ. ಇಂಥದೊಂದು ಧ್ವನಿ ಬರಬಹುದು ಎಂಬ ಕಲ್ಪನೆಯೆ ಇರದಿದ್ದು ಕಾರಣ. ಈ ಸಂದರ್ಭದಲ್ಲಿ ದೇಗುಲದ ಆಡಳಿತ ಮಂಡಳಿ ಏನು ಮಾಡಬಹುದು-ಏನು ಮಾಡಬೇಕು....?

ಎರಡು ವರ್ಷ ಎರಡು ತಿಂಗಳ ( ಜೂನ್ 11 ಗುರುವಾರ, 2009) ರಂದು ಅಂದಿನ ಹಾಲಿ ಸಚಿವ ಜನಾರ್ದನ ರೆಡ್ಡಿ ಕಣ್ಣು ಕೊರೈಸುತ್ತಿದ್ದ ವಜ್ರಖಚಿತ ಕಿರೀಟವನ್ನು ತಿರುಪತಿ ದೇಗುಲಕ್ಕೆ ನೀಡಿದರು. ರೆಡ್ಡಿ ಕುಟುಂಬ ಮತ್ತು ಆಪ್ತ ಬಳಗದ ಮಾಜಿಯಾಗಿರದ ಸಚಿವ ಶ್ರೀರಾಮುಲು ಶಾಸಕ ಸುರೇಶ್ ಬಾಬು ಜೊತೆಗಿದ್ದರು. ತಿರುಪತಿ-ತಿರುಮಲ ದೇವಸ್ಥಾನಮ್ ಮಂಡಳಿಯ ಅಧ್ಯಕ್ಷ ಆದಿಕೇಶವಲು ಮತ್ತು ಇನ್ನಿತರ ಪ್ರಮುಖ ಸದಸ್ಯರು  ಖುದ್ದು ಹಾಜರಿದ್ದು ದೇಗುಲದ ಪರವಾಗಿ ಕಿರೀಟ ಸ್ವೀಕರಿಸಿದರು. ಇದಕ್ಕೂ ಮುನ್ನ ದೇವಾಲಯದ ಪ್ರಾಂಗಣದಲ್ಲಿ ಕಿರೀಟದ ಮೆರವಣಿಗೆ-ವಿಶೇಷ ಪೂಜೆ ಸಲ್ಲಿಸಲಾಗಿತ್ತು. 'ನಾನು ಇಷ್ಟು ಉನ್ನತ ಸ್ಥಾನಕ್ಕೇರಲು ದೇವರ ಕೃಪೆಯೆ ಕಾರಣ. ಈ ಕಾರಣದಿಂದಲೇ ಇಷ್ಟು ಸಣ್ಣ ಕಾಣಿಕೆ ಅರ್ಪಿಸುತ್ತಿದ್ದೇನೆ.ಮಾಧವ ಸೇವೆಯಲ್ಲಿ ನನಗೆ ಅಪಾರ ನಂಬಿಕೆ. ಕಡಪಾ ಜಿಲ್ಲೆಯಲ್ಲಿ ಬೃಹತ್ ಉಕ್ಕು ತಯಾರಿಕಾ ಘಟಕ ಸ್ಥಾಪಿಸುತ್ತಿದ್ದೇನೆ. ಇದರಿಂದ 25 ಸಾವಿರ ಮಂದಿಗೆ  ಉದ್ಯೋಗ ದೊರೆಯುತ್ತದೆ. ಮಾನವ ಸೇವೆಯಲ್ಲಿಯೂ ನನಗೆ ನಂಬಿಕೆ ಇದೆ'  ಇದು ಜನಾರ್ದನ ರೆಡ್ಡಿ ಅಂದಿನ ಮಾತು.

ಥಳಥಳನೇ ಹೊಳೆಯುತ್ತಿದ್ದ ವಜ್ರಖಚಿತ ಕಿರೀಟದ ಬೆಲೆ ಕೇಳಿದೊಡನೆ ಅಲ್ಲಿದ್ದವರು ಒಮ್ಮೆ ಬೆಚ್ಚಿದ್ದರು. ತಿರುಪತಿ ತಿಮ್ಮಪ್ಪನಿಗೆ ಭಾರಿ ಬೆಲೆಬಾಳುವ ಅತ್ಯಮೂಲ್ಯ ವಸ್ತುಗಳು ಕಾಣಿಕೆಯಾಗಿ ದೊರೆಯುವುದು ಸಾಮಾನ್ಯ. ಆದರೆ 45 ಕೋಟಿ ರುಪಾಯಿ ಮೌಲ್ಯದ; ಅತ್ಯಮೂಲ್ಯ ವಜ್ರಗಳಿದ್ದ ಕಿರೀಟ ಬಂದಿರಲಿಲ್ಲ !

30 ಕೆಜಿ ತೂಕದ ಈ ಕಿರೀಟವನ್ನು ಮಾಡಲು ತಮಿಳುನಾಡು ಕೊಯಮತ್ತೂರಿನ ಕೀರ್ತಿಲಾಲ್ ಜ್ಯೂವೆಲರ್ಸ್ ಒಂಭತ್ತು ತಿಂಗಳ ಅವಧಿ ತೆಗೆದುಕೊಂಡಿದ್ದರು. ಇದನ್ನು ನಿರ್ಮಿಸುವ ಅವಧಿಯಲ್ಲಿ 32 ಕೆಜಿ ಅಪರಂಜಿ ಚಿನ್ನ ಬಳಸಲಾಯಿತು. ನಾಲ್ಕು ಸಾವಿರ ಕ್ಯಾರಟ್ ತೂಕದ ಸಹಸ್ರಾರು ಸಣ್ಣಸಣ್ಣ ಡೈಮಂಡ್ಸ್, 890 ಕ್ಯಾರಟ್ ತೂಕದ ಎಮರಾಲ್ಡ್ಸ್ (ಪಚ್ಚೆ) ಬಳಸಿ ಎರಡೂವರೆ ಅಡಿ ಎತ್ತರದ ಕಿರೀಟವನ್ನು ಕಲಾತ್ಮಕವಾಗಿ   ನಿರ್ಮಿಸಲಾಯಿತು. ಪಚ್ಚೆಯನ್ನು ಆಫ್ರಿಕಾದಿಂದ ಆಮದು ಮಾಡಿಕೊಳ್ಳಲಾಗಿತ್ತು. ಇದರ ಬೆಲೆಯೆ 10 ಕೋಟಿ !

ಆದರೆ ಕಡಪಾದಲ್ಲಿ 'ಬ್ರಹ್ಮಿಣಿ ಸ್ಟೀಲ್ಸ್' ಆರಂಭಗೊಳ್ಳಲಿಲ್ಲ. 25 ಸಾವಿರ ಮಂದಿಗೆ ಉದ್ಯೋಗವೂ ದೊರೆಯಲಿಲ್ಲ. ಕಡೆಗೆ ಬಳ್ಳಾರಿಯಲ್ಲಿ ಇದನ್ನು ಆರಂಭಿಸುತ್ತೇವೆ ಎಂದು ಕರ್ನಾಟಕ ಸರಕಾರದಿಂದ ಲೈಸನ್ಸ್-ಜಮೀನು ಎಲ್ಲವನ್ನೂ ಪಡೆದುಕೊಂಡರು. ಆದರೆ ಇಲ್ಲಿಯೂ ಇವರಿಂದ ಯೋಜನೆ ಆರಂಭಗೊಳ್ಳಲಿಲ್ಲ. ಹಾಗಿದ್ದರೆ ಆ ಮಾಧವನಿಗೆ ಜರ್ನಾದನ ರೆಡ್ಡಿ ಕಾಣಿಕೆ-ಸೇವೆ ಇಷ್ಟವಾಗಲಿಲ್ಲವೆ...? ಈ ವಿಷಯ ಅತ್ತ ಇರಲಿ.. ಈಗ ಕಿರೀಟದ ವಿಷಯಕ್ಕೆ ಮತ್ತೆ ಬರೋಣ.

ಭಕ್ತ ಸಮುದಾಯದ ಈ ಆಗ್ರಹ ನಿಲ್ಲುವ ಲಕ್ಷಣ ಕಾಣುತ್ತಿಲ್ಲ. ಕಿರೀಟವನ್ನು ವಾಪ್ಪಸ್ಸು ಮಾಡಲೇಬೇಕು ಎಂಬ ಒತ್ತಡ ಹೆಚ್ಚುತ್ತಿದೆ. ಇದು ಈಡೇರಿದರೆ ಇಡೀ ಭಾರತದಲ್ಲಿಯೆ ಅತ್ಯಪೂರ್ವ ಘಟನೆಗೆ ತಿರುಪತಿ ಸಾಕ್ಷಿಯಾಗುತ್ತದೆ. ಇದುವರೆಗೆ ದೇಗುಲಗಳಿಗೆ ಕಾಣಿಕೆ ನೀಡಿದವರು ಆರೋಪಗಳಿಂದ ಜೈಲಿಗೆ ಹೋಗುವ ಪರಿಸ್ಥಿತಿ ನಿರ್ಮಾಣವಾದಾಗ ಅವರು ನೀಡಿದ್ದನ್ನು ಹಿಂದಿರುಗಿಸಿದ ಮತ್ತು ಭಕ್ತ ಸಮುದಾಯ ಇಂಥ ಒತ್ತಾಯ ಮುಂದಿಟ್ಟ ಉದಾಹರಣೆ ಇಲ್ಲ. 'ತಿರುಪತಿ-ತಿರುಮಲ ದೇವಸ್ಥಾನಮ್' ಆಡಳಿತ ಮಂಡಳಿ ಮುಂದೇನು ಮಾಡಬೇಕು ಎಂಬ ಯೋಚನೆಯಲ್ಲಿದೆ. ನಿಮ್ಮ ಸಲಹೆ ಏನು...?